“၇၈၆” သည် အစ္စလာမ်၏ အမှတ်သင်္ကေတ မဟုတ်။

လတ်တလောဖြစ်ပေါ်နေသော ပဋိပက္ခများတွင် “၇၈၆” ဂဏန်းသည်လည်း ပယောဂတစ်ခုသဖွယ် ပါဝင်လျှက်ရှိသည်။ မြန်မာမွတ်စလင်မ်တို့သည် နှစ်ကာလအတန်ကြာကတည်းက “၇၈၆” ဂဏန်းကို မိမိတို့၏ ဆိုင်များ၊ အိမ်များတွင် ချိတ်ဆွဲခဲ့ကြသည်။ မည်သူက စတင်ခဲ့မှန်းမသိရသော ဤအလေ့အထသည် ယခုအခါ ပြဿနာဖြစ်စေမည့် အကြောင်းခံတစ်ခု ဖြစ်လျှက်ရှိပေသည်။ မွတ်စလင်မ်တို့သည် မရိုးသားသောသဘောထားဖြင့် ဤဂဏန်းကို ချိတ်ဆွဲနေကြသယောင်၊ သို့မဟုတ် တစ်စုံတစ်ရာက ချိတ်ဆွဲရန် လှုံ့ဆော်လိုက်လေသယောင် အထင်လွဲမှား ခံရလျှက် ရှိပေသည်။

အစ္စလာမ်ကို မလိုမုန်းထားသူများမှ ဤဂဏန်းနှင့်အပြိုင် အခြားဂဏန်းတစ်ခုကို တီထွင်၍ မိမိတို့၏ နောက်လိုက်သြဇာခံများ၏ အိမ်များ၊ ဆိုင်များ၊ ယုတ်စွအဆုံး မော်တော်ကားများအထိ ချိတ်ဆွဲစေလျှက် အစ္စလာမ်ဆန့်ကျင်ရေးလှုပ်ရှားမှုကို ကျယ်ကျယ်ပြန့်ပြန့် ဆောင်ရွက်လျှက် ရှိပေသည်။ ဤသည်မှာ မိမိတို့က စတင်ခဲ့သော အခြေအမြစ်မရှိသည့် ကျင့်သုံးမှုတစ်မှုတစ်ခု၏ အကျိုးဆက်
ရလဒ်လည်း ဖြစ်ပေသည်။

အစ္စလာမ်သာသနာက မိမိ၏ သာသနာဝင်များကို အိမ်များ၊ ဆိုင်များတွင် “၇၈၆” ချိတ်ဆွဲရန် ညွှန်ကြားထားခြင်း မရှိပေ။ အစ္စလာမ့်တရားဓမ္မစာပေများကို အလုံးစုံ လိုက်လံရှာဖွေ ဖတ်ရှုလျှင်လည်း “၇၈၆” ချိတ်ဆွဲရန် ညွှန်ပြဟောပြောချက်ဟူ၍ 
လုံးဝ တွေ့ရလိမ့်မည် မဟုတ်ပေ။ ဤအလေ့အထသည် မြန်မာနိုင်ငံနှင့် အချို့သောနိုင်ငံများရှိ အစ္စလာမ်ဘာသာဝင်များ၏ အလေ့အထသက်သက်သာဖြစ်သည်။

ဤသို့ အစ္စလာမ့်တရားတော်အရ အခြေအမြစ်မရှိသော ကိစ္စရပ်တစ်ခုကို မွတ်စလင်မ်တစ်ဦးက သာသနာ့ကျင့်သုံးမှုသဖွယ် သဘောထားမည်ဆိုလျှင် ဗစ်ဒ်အတ်ခေါ် တရားလမ်းစဉ်အသစ် တီထွင်ဖော်ထုတ်မှုဖြစ်၍ လွန်စွာ အပြစ်ကြီးပေသည်။ ဤကဲ့သို့ လုပ်ရပ်မျိုးကို စွန့်လွှတ်ရန် အတိုင်းထက် အလွန် အရေးကြီးလှပေသည်။

ယခုအခါ မြန်မာမွတ်စလင်မ်တို့သည် သမိုင်းစဉ်၏ ပြုပြင်ပြောင်းလဲမှု အချိုးအကွေ့တစ်ခုကို ကြုံတွေ့ရင်ဆိုင်ရလျှက် ရှိပေသည်။ ဤပြုပြင်ပြောင်းလဲမှုကာလသည် မြန်မာ့နိုင်ငံရေးခေါင်းဆောင်များ သတိပေးသကဲ့သို့ အခက်အခဲ၊ အကျဉ်းအကြပ် စမ်းသပ်မှုများ ပြည့်နှက်လျှက်ရှိသော ကာလပင် ဖြစ်သည်။ ဤကာလတွင် မြန်မာမွတ်စလင်မ်တို့သည် အသွင်သဏ္ဍာန်အမျိုးမျိုးဖြင့် ခုတုံးလုပ် အသုံးချခံရလျှက် ရှိသဖြင့် အကျဉ်းအကြပ်အခက်အခဲစမ်းသပ်မှုသည် ပို၍ ပြင်းထန်သည်ဟု ဆိုနိုင်ပေသည်။

ဤသမိုင်းကြောင်းအရ ဖြစ်ပေါ်လာသော ပြုပြင်ပြောင်းလဲရေး ကာလကြီးတွင် မိမိတို့ကိုယ်တိုင်လည်း လိုက်ပါပြောင်းလဲနိုင်မှသာ မြန်မာမွတ်စလင်မ်တို့သည် မြန်မာ့လူ့အစုအဝေးတွင် ဆက်လက် ရှင်သန်တည်မြဲနိုင်မည် ဖြစ်သည်။ သို့မဟုတ်ပါမူ ရေးစီးကြောင်းအတွင်းမှ အမှိုက်သရိုက်ဒိုက်မှော်များသဖွယ် ကမ်းတစ်နေရာတွင် ကပ်ကျန်ခဲ့ဖြစ်သာ ဖြစ်ပေသည်။

ပြုပြင်ပြောင်းလဲရေးနှင့်အတူ လိုက်ပါပြောင်းလဲခြင်း မရှိလျှင် အပယ်ခံ၊ အကျဉ်ခံများအဖြစ် စည်းဝိုင်းအပြင်ရောက် အနာဂတ်ပျောက်ဆုံးနိုင်သည်ဟုဆိုသဖြင့် မွတ်စလင်မ်တို့သည် မိမိတို့၏ ဘာသာရေး ကျင့်သုံးမှုများကို စွန့်လွှတ်ရတော့မှာလား။ အများစုနှင့်ရော၍ ရေလိုက်ငါးလိုက် ပေါ့ဆစွာ နေရတော့မှာလားဟု မေးစရာရှိပေသည်။ လက်ရှိ ပြုပြင်ပြောင်းလဲရေးနှင့်အတူ လိုက်ပါပြောင်းလဲရမည်ဟု ဆိုခြင်းသည် ဘာသာရေးကျင့်သုံးမှုများကို စွန့်ပစ်ရမည်ဟူသော အဓိပ္ပါယ် (အလျဉ်း) မထွက်ပါ။ ထို့ပြင် ရောယိမ်းလိုက်ဘသားယိမ်းလိုက် ပေါ့ဆစွာနေထိုင်ရမည်ဟု ဆိုလိုခြင်းလည်း လုံးဝ မဟုတ်ပါ။

လိုက်ပါပြောင်းလဲရမည်ဟူသောစကားသည် မြန်မာမွတ်စလင်မ်တို့အနေနှင့် နောက်က မကျန်ရစ်ဘဲ အများနှင့်တန်းတူ ရင်ဘောင်တန်းလိုက်နိုင်ရန် ရည်ရွယ်ပြောဆိုခြင်းသာ ဖြစ်သည်။ ထိုသို့ လိုက်ပါရန်အတွက် မိမိတို့ ကျောကုန်းပေါ် မည်သူကမျှ လာမတင်ဘဲ၊ မိမိတို့ကိုယ်တိုင်တင်ထားသော ၀န်ထုတ်ဝန်ပိုးများကို ပထမဆုံး ဖယ်ရှားပစ်ဖို့ အရေးကြီးပါသည်။

ကျွန်တော်တို့သည် “၇၈၆”နှင့်အလားတူ အစ္စလာမ်က ညွှန်ပြထားခြင်းမရှိသော ကျင့်သုံးမှုများကို အရေးတကြီးလုပ်၍ အရိုးစွဲ ကျင့်သုံးလျှက် ရှိကြပါသည်။ အစ္စလာမ်က ဗလီဝတ်ကျောင်းတော်များကို (အလွန်အကျွံ) ဆင်ယင်ချယ်သခြင်း မပြုရန် တားမြစ်ထားသည်။ ကျွန်တော်တို့က ဗလီဝတ်ကျောင်းတော်များကို ရွှေမချယုံတမယ် ချယ်သကြသည်။ ထိုအခါ မျက်စိစပါးမွှေးဆူးသူကိုချည်း အပြစ်တင်မည်ဆိုလျှင် တရားမျှတမည် မဟုတ်ပေ။

အစ္စလာမ်ကို ဖြန့်ချိပို့ချမည့် ကျောင်းများရှိရန် အလွန် အင်မတန်အရေးကြီးသည်မှာ မှန်ကန်ပါသည်။ သို့သော် တစ်နိုင်ငံလုံးတွင် ပညာရှင်များမွေးထုတ်ပေးရန် အဆင့်မှီသည့် တက္ကသိုလ်ဆယ်ဂဏန်းမျှရှိလျှင် လုံလျှောက်ပါလျှက် ကျောင်းများကို မှိုလိုပေါက်အောင် ဖွင့်လှစ်ထူထောင်ကြသည်။ တစ်ရွာတည်းမှာ အာလင်မ်ကျောင်း နှစ်ကျောင်းသုံးကျောင်း ဖွဲ့စည်းထားသည့် ရွာတစ်ရွာမက ရှိသည်။ ထိုကျောင်းများ လည်ပတ်နိုင်ရန် အဓိကသုံးစွဲရမည့် ရန်ပုံငွေမှာ ဆင်းရဲသားများအဓိကစားထိုက်သည့် ဇကတ်ငွေ သိန်းထောင်ပေါင်းများစွာကို မလိုအပ်ဘဲ အပိုဖွင့်ထားသော ဘာသာရေးကျောင်းများက ကောက်ခံသုံးစွဲပစ်လျှက် ရှိပေသည်။ ထိုသို့ သုံးစွဲရန် အစ္စလာမ်က ညွှန်ပြထားလျှင် မည်သို့မျှ စောဒကတက်ရန် မရှိပေ။ သို့သော် ဤသို့ ဖောင်းပွနေသော ကျောင်းများသည် မြန်မာမွတ်စလင်မ် လူ့အစုအဝေး၏ ရှေ့ဆက်ရမည့် ခရီးလမ်းတွင် ၀န်ထုပ်ဝန်ပိုး ဖြစ်နေပြီဆိုလျှင်မူကား ၀န်ထုပ်ဝန်ပိုးကို စွန့်လွှတ်မည်လား။ အများနှင့်တန်းတူ ရင်ဘောင်တန်းလိုက်ပါမည်လား ဆိုသည်ကို စဉ်းစားရွေးချယ်ကြရတော့မည် ဖြစ်သည်။

အရေးအကြီးဆုံးမှာ လက်ရှိဖြစ်ပွားနေသော ပြဿနာရပ်များတွင် မွတ်စလင်မ်များဘက်မှလည်း ပြုပြင်စရာများရှိလာကြောင်း အသိအမှတ်ပြုရန် ဖြစ်သည်။ ထို့ပြင် ထိုပြုပြင်ရမည့်အချက်များကို စာရင်းချကြည့်လျှင် အစ္စလာမ်က ညွှန်ပြထားခြင်း မရှိသော “၇၈၆”ကဲ့သို့ ကိစ္စများကို ဘာသာရေး၊ သာသနာရေးသဖွယ် လုပ်နေခြင်းက အများစုဖြစ်သည်ကို တွေ့ရမည် ဖြစ်သည်။ ဤအချက်ကို နားလည်သဘောပေါက်သော အိုလမာသာသနာ့ပညာရှင်များ၊ အဖွဲ့အစည်းခေါင်းဆောင်များက မိမိတို့ လူ့အဖွဲ့အစည်းကို ထောက်ပြ ညွှန်ကြားကြရမည် ဖြစ်ပါသည်။ မြန်မာမွတ်စလင်မ် ခေါင်းဆောင်များအနေနှင့် ဤအလုပ်ကို ပြုပြင်ပြောင်းလဲရေးကာလတွင် ပထမဆုံးလုပ်ရမည့် အလုပ်ဟု သဘောထား၍ ရဲဝံ့ပွင့်လင်းစွာ ဆောင်ရွက်ကြပါရန် နှိုးဆော်လိုက်ပါသည်။

မော်လာနာပသီဦးကျော်ဦး

သမိုင်းသုတေသီ၊ အစ္စလာမ့်သာသနာ့ပညာရှင်နှင့် ဓမ္မသတ်မှူး

ဖုန်း- 09 444 011 806

Email: pathikyawoo59@gmail.com