တိုင်းချစ်ပြည်ချစ်စိတ်ကို မွေးမြူရမှာဖြစ်ပါတယ်။

မျိုးချစ်စိတ်ဆိုတာ လူသားတိုင်းမှာ ရှိသင့်ပါတယ်။ ကိုယ့်တိုင်းပြည်၊ ကိုယ့်လူမျိုး ချစ်တဲ့စိတ်ဓာတ် လူသားတိုင်းမှာ ရှိသင့်တယ်။ကိုယ့်တိုင်းပြည်၊ ကိုယ့်လူမျိုး တိုးတက်စေချင်တဲ့စိတ်ဓာတ် လူသားတိုင်းမှာ ရှိကိုရှိရမယ်။

မျိုးချစ်စိတ်လို့ တစာစာဟစ်ကြွေးနေပြီး မိမိနဲ့ဒေသမတူလို့၊ မိမိနဲ့လူမျိုးမတူလို့၊ မိမိနဲ့ဘာသာမတူလို့၊ မိမိနဲ့အသားအရောင်မတူလို့၊ မိမိနဲ့အဆင့်အတန်းမတူလို့၊ မိမိနဲ့ အတွေးအခေါ်အယူအဆမတူလို့ စတဲ့

မတူကွဲပြားသူတွေအပေါ်မှာနှိမ့်ချဆက်ဆံလိုတဲ့အမြင်နဲ့ မလိုမုန်းတီးတဲ့စိတ်ကို အခြေခံထားတဲ့ မျိုးချစ်စိတ်ကတော့ ကမ္ဘာလောကကြီးရဲ့ ငြိမ်းချမ်းမှုအတွက် ဆူးညှောင့်ခလုပ်ဖြစ်စေမယ်။
ကမ္ဘာလောကကြီးရဲ့ သာယာမှုအတွက် အဆိပ်အတောက်ဖြစ်စေမယ်။ ကမ္ဘာလောကကြီးရဲ့ ဖွံ့ဖြိုးစည်ပင်မှုအတွက် အဟန့်အတားဖြစ်စေမယ်။

မျိုးချစ်စိတ်မှာ မတူကွဲပြားတာကို မလိုမုန်းတီးစိတ်ဝင်လာပြီဆိုတာနဲ့ ဒါဟာ အရိုင်းစိတ်ပါပဲ။ ဒါဟာ အတ္တစိတ်ပါပဲ။ ဒါဟာ တိရစ္ဆာန်စိတ်ပါပဲ။ တိရစ္ဆာန်တွေမှာရှိတဲ့ မျိုးချစ်စိတ်နဲ့ အလားသဏ္ဍာန်တူတယ်။ကျီးကန်းတွေ၊ ပျားတွေနဲ့ ခွေးအ တွေမှာလည်း အဲဒီလို မျိုးချစ်စိတ်မျိုးရှိတယ်။ အမုန်းတရားတွေ ပေါင်းစပ်ထားတဲ့ မျိုးချစ်စိတ်က
အောက်တန်းကျတဲ့မျိုးချစ်စိတ်၊ မျက်ကန်းမျိုးချစ်စိတ်သာဖြစ်တယ်။

လူသားတွေမှာရှိရမယ့် မျိုးချစ်စိတ်ဆိုတာ ဘာသာတရားတွေရဲ့အဆုံးအမတွေဖြစ်တဲ့ ဗြဟ္မစိုရ်တရားနဲ့ အညီဖြစ်သင့်တယ်။ အမုန်းတရားကင်းတဲ့ မျိုးချစ်စိတ်ဖြစ်ရမယ်။ လူသားတိုင်းကို လူသားဆိုတဲ့အမြင်နဲ့ အမုန်းတရားကင်းတဲ့ ချစ်စိတ်ထားတတ်ရမယ်။ အမုန်းတရားကင်းတဲ့ မျိုးချစ်စိတ်သာလျှင် အဆင့်မြင့်တဲ့ မျိုးချစ်စိတ်ဖြစ်တယ်။ အမုန်းတရားကင်းတဲ့ မျိုးချစ်စိတ်ကနေ တိုင်းချစ်ပြည်ချစ်စိတ်ကို မွေးမြူရမှာဖြစ်ပါတယ်။
______________________________________
m y O e w y n n _ 0 1 . 0 8 . 2 0 1 4