မိမိတို့ရဲ့စိတ်ဓာတ်တွေကို ဦးစွာပထမတော်လှန်ရမှာဖြစ်ပါတယ်။

ကျွန်တော်တို့နိုင်ငံမှာကြုံတွေ့နေရတဲ့ လူမျိုးရေးခွဲခြားမှုတွေ၊ နှိမ်ချဆက်ဆံမှုတွေ၊ ပြဿနာတွေ အခက်အခဲတွေနဲ့ လူနည်းစုလူမျိုးစုတွေအပေါ်အကြမ်းဖက်မှုတွေ၊ အနိုင်ကျင့်စိုးမိုးမှုတွေကို စမ်းစစ်ကြည့်တဲ့အခါမှာ နှစ်ပေါင်းငါးဆယ်ကျော်ကြာအောင် အုပ်ချုပ်ခဲ့တဲ့ အာဏာရှင်စံနစ်ဆိုးရဲ့ စနစ်တကျ အကွက်ချ စီစဉ်ဖန်တီးထားတဲ့ လက်ကျန်အမွေဆိုးတွေပါ။ ပြည်သူလူထုအချင်းချင်း စည်းလုံးညီညွတ်မှုကို ပျက်ပြားအောင် ဖန်တီးထားတဲ့
ဗျူဟာတစ်ရပ်ပါ။ နှစ်ပေါင်းငါးဆယ်ကျော် မွှေးခဲ့တဲ့ သံသယမီးတွေပါ။ အာဏာတည်မြဲရေးအတွက်ပြင်ဆင်ထားတဲ့ ထောင်ချောက်တွေထဲက တစ်ခုပါ။
နှစ်ပေါင်းငါးဆယ်ကျော် အမှောင်ဖုံးခဲ့တဲ့၊ ၀ါဒမှိုင်းမိခဲ့ရတဲ့ ပြည်သူလူထုအနေနဲ့ အာဏာရှင်စံနစ် ဟောင်းရဲ့ အကျင့်ဆိုးတွေ၊ အမှောင်ခေတ်ရဲ့စရိုက်ဆိုးတွေ၊ အတွေးအခေါ်ဆိုးတွေ၊ အပြုအမူ ဆိုးတွေ၊ အယူအဆမှားတွေနဲ့ အစွဲမှားတွေကို မိမိတို့ ကိုယ်တိုင်တော်လှန် ပြုပြင်ရမှာ ဖြစ်ပါတယ်။
မိမိတို့စိတ်ထဲ၊ ရင်ထဲမှာ ကိန်းအောင်းနေတဲ့သံသယတွေ၊ အမုန်းတရားတွေနဲ့ ခွဲခြားဆက်ဆံ လိုမှုတွေ၊ အကြမ်းဖက်လိုမှုတွေ၊ အနိုင်ယူလိုမှုတွေကို မိမိတို့စိတ်ထဲ၊ ရင်ထဲက ပပျောက် ကင်းစင် သွားအောင် မိမိတို့ကိုယ်တိုင် မိမိတို့ရဲ့စိတ်ဓာတ်တွေကို ဦးစွာပထမ တော်လှန်ရမှာဖြစ်ပါတယ်။
ဒီလိုတော်လှန်နိုင်မှလည်း တစ်ဦးနဲ့တစ်ဦး၊ တစ်အုပ်စုနဲ့ တစ်အုပ်စု သံသယတွေ ကင်းစင်၍၊ နားလည်ခွင့်လွှတ်နိုင်ပြီး ဂုဏ်ပေး လေးစားဆက်ဆံနိုင်ကြမှာဖြစ်တယ်။
သို့မှသာ စည်းလုံးညီညွတ်နိုင်မှာဖြစ်ပြီး၊ စည်းလုံးမှုကို အင်အားတစ်ရပ်အဖြစ် အသုံးချကာ မိမိတို့ရည်မှန်းချက်ဖြစ်တဲ့ ဒီမိုကရေစီပန်းတိုင်ကို မရောက်ရောက်အောင် တက်လှမ်းနိုင်မှာ ဖြစ်ပါတယ်။
_____________________________________
m y O e w y n n _ 1 8 . 0 8 . 2 0 1 4