တစ်ခြားနည်းလမ်း မရှိနိုင်တော့ပါ။

ဒီမိုကရေစီနိုင်ငံရဲ့ အုပ်ချုပ်တဲ့အစိုးရဆိုတာ
လူ ကောင်းရမယ်။ တိုင်းပြည်နဲ့လူထုအပေါ်မှာ စေတနာကောင်းမွေးမြူရမယ်။
မြင့်မြတ်တဲ့စိတ်သဘောထား၊ လူကြီးလူကောင်းစိတ်ဓာတ်နဲ့
မျှတတဲ့စိတ်ဓာတ်ပိုင်ရှင်ဖြစ်ရမယ်။ ကိုယ်ကျင့်တရားကောင်းရမယ်။

ပညာကောင်း၊ ဥာဏ်ကောင်း၊ အကြံဥာဏ်ကောင်းတွေရှိရမယ်။
ပြုပြင်ပြောင်းလဲလိုစိတ်ရှိသူတွေကို လက်ခံနိုင်တဲ့ အရည်အချင်းရှိရမယ်။

ဒီမိုကရေစီဆိုတဲ့မူဝါဒက အခုခေတ်မှာတော့အကောင်းဆုံးဆိုပေမယ့်
မူကောင်းရုံနဲ့ တိုင်းပြည်ကောင်းလာမှာမဟုတ်ဘူး။
အုပ်ချုပ်တဲ့အစိုးရမှာ လူကောင်းဖို့လည်း အဓိကလိုအပ်ပါတယ်။
မူကောင်းပြီးလူမကောင်းရင် တိုင်းပြည်နဲ့လူထု တိုးတက်မှာမဟုတ်ဘူး။

အုပ်ချုပ်တဲ့အစိုးရမှာရှိတဲ့လူတွေဟာ ကိုယ်ကျိုးမဖက် အများပြည်သူလူထုအတွက်ကြည့်ပြီး
အားလုံးအတွက်ကောင်းမွန်စေမယ့် နည်းလမ်းတွေကိုရှာဖွေရမယ်။
တိုင်းပြည် အေးချမ်းသာယာ တည်ငြိမ်အောင် ဖန်တီးရမယ်။
တိုင်းပြည်တွင်းက လူထု လူ့အဖွဲ့အစည်းအားလုံး စည်းလုံးညီညွတ်အောင်ဖန်တီးရမယ်။

တရားမျှတမှု၊၊ တန်းတူညီမျှမှု၊ လွတ်လပ်မှု၊ ငြိမ်းချမ်းမှုတွေ အခြေခံပြီး
လူတိုင်း လူမှုဘ၀အဆင်ပြေချောမွေ့ပြီး ဘ၀သာယာပျော်ရွှင်ရေးအခွင့်အလမ်းတွေ
ဖန်တီးပေးနိုင်မှသာ ဒီမိုကရေစီနိုင်ငံတော်ရဲ့ အုပ်ချုပ်တဲ့အစိုးရကောင်းပီသမှာဖြစ်တယ်။
အုပ်ချုပ်တဲ့အစိုးရဆိုတာ တိုင်းပြည်နဲ့ လူထုလူတန်းစားအသီးသီးကို
အကောင်းဆုံးလုပ်ပေးနိုင်ဖို့ အမြဲကြိုးစားနေမှသာ
ဒီမိုကရေစီနိုင်ငံတော်ရဲ့ အစိုးရအဖြစ်ထိုက်တန်မှာဖြစ်တယ်။

အုပ်ချုပ်တဲ့အစိုးရကိုယ်တိုင်က ငါ့လူမျိုး၊ ငါ့ဘာသာအရေး၊
ငါ့ပါတီ၊ ငါ့အဖွဲ့အစည်း၊ ငါ့အုပ်စု၊ ငါ့မိသားစုအရေး
ဦးစားပေးလှုပ်ရှားနေရင်၊ ကိုယ်ရေးကိုယ်တာ စွက်ဖက်မှုများနေရင်
တိုင်းပြည်လည်းမကြီးပွား မတိုးတက်၊ ကမ္ဘာအလယ် မျက်နှာငယ်ရုံသာမက
လူထုလည်း ဆင်းရဲမွဲတေပြီး အတိဒုက္ခတွေထဲမှာနစ်မွန်းနေတော့မှာဖြစ်တယ်။

တိုင်းပြည်နဲ့ လူထုအကျိုးမကြည့်ဘဲ ကိုယ်ကျိုးသာကြည့်တဲ့
အာဏာရှင်ဆန်ဆန်အစိုးရမျိုး အုပ်ချုပ်တဲ့နိုင်ငံတွေမှာ
ဒီမိုကရေစီရဲ့အခြေခံသဘောတရားကတော့
လူထုက အားလုံး စည်းလုံးညီညွတ်စွာနဲ့ အစိုးရကို အယုံအကြည်မရှိကြောင်း
တစ်သွေးတစ်သံတည်း ဆန္ဒထုတ်ဖော်တောင်းဆိုရုံကလွဲလို့
တစ်ခြားနည်းလမ်းမရှိနိုင်တော့ပါ။
_____________________________________________
m y O e w y n n _ 2 9 . 0 4 . 2 0 1 4