ဒီမိုကရေစီနဲ့အမြန်ဆုံးနီးအောင်

ဒီမိုကရေစီဆိုတာ အများသဘောတူတာကို လက်ခံကျင့်သုံးရတဲ့စနစ်ပါ။
ဒါပေမယ့် လူနည်းစုရဲ့သဘောထားဆန္ဒများကို လေးစားအသိအမှတ်ပြုရတဲ့
စနစ်လည်းဖြစ်ပါတယ်။ အများစုသဘောတူတာကို အနည်းစုက ကြိုက်သည်ဖြစ်စေ မကြိုက်သည်ဖြစ်စေ
လိုက်နာဆောင်ရွက်ရတဲ့စနစ်ကို ဒီမိုကရေစီစနစ်လို့ ခေါ်ပါတယ်။
လူတွေအားလုံးကြိုက်တဲ့နိုင်ငံရေးခေါင်းဆောင်ဆိုတာလည်းမရှိပါဘူး။ 
အကြိုက်တွေမတူတာ ဒီမိုကရေစီပါ။ တစ်ယောက်ထဲကိုကြိုက်ရမယ်ဆိုရင် 
အာဏာရှင်စနစ်သာဖြစ်ပါလိမ့်မယ်။

ငါနဲ့ လူမျိုးမတူရင်၊ ဘာသာမတူရင်၊ အုပ်စုမတူရင်၊ ယုံကြည်ချက်မတူရင်၊ အတွေးအခေါ်မတူရင် ငါ့ရန်သူလို့ သဘောထားနေသမျှ ဒီမိုကရေစီနဲ့ ဆန့်ကျင်ပါတယ်။ မတူညီတဲ့ သဘောထားတွေကို
လက်ခံဖို့ အားလုံးက အဆင်သင့်ဖြစ်ကြပြီဆိုရင် ဒီမိုကရေစီရပြီလို့ ပြောနိုင်ပါမယ်။
ဒီမိုကရေစီခရီးကြမ်းကြီးနှင်နေကြရတဲ့ ခုလိုကာလမျိုးမှာ စိတ်ရှည်သည်းခံမှု၊ အမြော်အမြင်၊ စည်းလုံးညီညွတ်မှု၊ ဇွဲလုံ့လဝီရိယ စတာတွေ အထူးတလည်လိုအပ်ပါတယ်။

ကျွန်တော်တို့နိုင်ငံဟာ အခုဒီမိုကရေစီနိုင်ငံဘဝရောက်သေးတာ မဟုတ်ပါဘူး။
အာဏာရှင်စနစ် အပြီးတိုင်ချုပ်ငြိမ်းသွားပြီလို့ ပြောလို့ရသေးတဲ့အချိန်မရောက်သေးပါဘူး။
ဒီမိုကရေစီစနစ်နဲ့လိုက်လျောညီထွေရှိမယ့် အခြေခံကောင်းများရရှိဖို့ရှာဖွေကြိုးပမ်းနေဆဲကာလ
အပြောင်းအလဲရဲ့အစမှာပဲရှိပါသေးတယ်။ လက်ရှိအနေအထားကို ရရှိရောက်ရှိလာအောင် မချိမဆန့်စတေးခဲ့ပေးဆပ်ခဲ့ရတာ ဖြစ်ပါတယ်။ အလွယ်တကူရလာတဲ့အနေအထားမဟုတ်ပါဘူး။
အခုမှ မျှော်လင့်ချက်ရောင်ခြည်လေး တစ်စွန်းတစ်စ မြင်ရမယ်ကြံရုံရှိသေးတယ်။ တိုင်းပြည်ကိုပြန်လည်ထူထောင်တဲ့အလုပ်ကို ပီပီပြင်ပြင်တောင် မလုပ်နိုင်သေး
ပါဘူး။ အပြင်းအထန် ရုန်းကန်ရဦးမယ့် အခက်အခဲတွေဟာ ရှေ့မှာအမြောက်အများ ရှိနေသေးတယ်ဆိုတာ အားလုံးသတိပြုပြီး မိမိတို့ တတ်စွမ်းသမျှ လူတိုင်းက ပါဝင်ဆောင်ရွက်ကြရမယ့် သမိုင်းပေးတာဝန်ရှိပါတယ်။ မျက်ဖြူဆိုက်လေ ဆရာကြိုက်လေဆိုတဲ့အခြေအနေမျိုးကို ဖန်တီးမပေးမိဖို့ အထူးလိုအပ်ပါတယ်။

ဒီမိုကရေစီနဲ့အမြန်ဆုံးနီးအောင် နိုင်ငံသားတို့ အမြင်ကျယ်ကျယ် လေးလေးနက်နက်စဉ်းစားပြီး အများအကျိုးကို အမှန်တစ်ကယ်လိုလားတဲ့ ခေါင်းဆောင်ရဲ့ဦးဆောင်မှုအောက်မှာ သွေးမကွဲဘဲ စည်းစည်းလုံးလုံး ညီညီညွတ်ညွတ်နဲ့ လက်တွဲ ပူးပေါင်းဆောင်ရွက်ဖို့ လိုအပ်ပါတယ် ။ ခေါင်းဆောင်ကောင်း ဆိုတာ သိပ်ပေါပေါများများ
မရှိတဲ့ခေတ်ကာလမှာ အများအကျိုးကို အမှန်တစ်ကယ်လိုလားတဲ့ခေါင်းဆောင်ကို
လေးစားတန်ဖိုးထားကြဖို့ အချိန်ကျရောက်နေပြီလို့ပြောချင်ပါတယ်။
mmw.rasu_22.01.2014 —