သမိုင်းကိုမမေ့ကြဘဲ သင်္ခါန်းစာယူသင့်ကြပါပြီ။

လူမျိုးမတူလို့၊ ဘာသာမတူလို့၊ အုပ်စုမတူလို့၊ မွေဖွားရာဇာတိမတူလို့၊ အသားအရောင်မတူလို့၊၀တ်စားဆင်ယင်မှုမတူလို့၊ ဘာသာစကားမတူလို့၊ အယူအဆမတူလို့၊ အတွေးအခေါ်မတူလို့၊ ယုံကြည်မှုမတူလို့၊ ခံယူချက်မတူလို့ သွေးကွဲနေကြမှာလား။ ရန်သူလို့သတ်မှတ်မှာလား။ အဖိနှိပ်ခံအချင်းချင်း တိုက်နေ ခိုက်နေ အာဃာတတွေ ထားနေကြမှာလား။

ဒါဆို ပြဿနာတွေ၊ ပဋိပက္ခတွေ၊ အကြမ်းဖက်မှုတွေနဲ့ ရင်ဆိုင်နေကြရအုံးမှာပဲ။
လူသားအချင်းချင်းဆိုတဲ့အသိ၊ နိုင်ငံသားအချင်းချင်းဆိုတဲ့အသိနဲ့၊ အဖိနှိပ်ခံဘ၀တူ
တွေပဲ ဆိုတဲ့အသိနဲ့အချင်းချင်းအပြန်အလှန်နားလည်ခွင့်လွှတ်ကြပြီး နားလည်မှုတည်ဆောက်ကြမှာသာ၊ သွေးစည်းညီညွတ်ကြမှသာ
ပြဿနာတွေ၊ ပဋိပက္ခတွေ၊ အကြမ်းဖက်မှုတွေ ပြေလည်နိုင်မှာဖြစ်ပါတယ်။
ဒီလိုမှမဟုတ်ပါဘဲ အိုးမဲသုတ် ရန်တိုက် သွေးထိုးပေးနေတိုင်း မျက်ကန်း အတွေးမဲ့ အမြင်မဲ့ ဆက်တိုး နေကြအုံးမယ်ဆိုရင်တော့ တစ်ဖက်ဖန်တီးနေသူတွေ၊ အာဏာဆုတ်ကိုင်ထားလိုသူတွေ ဆင်ထားတဲ့အကွက်ထဲ တည့်တည့်တိုးဝင်မိပြီး
လမ်းကြောင်းဘက်ပြောင်းသွားမှဖြင့် ကျွန်ုပ်တို့ အသက် သွေး ချွေးနဲ့အချိန်များစွာ ရင်းနှီးထားခဲ့သမျှ သဲထဲရေသွန်ဖြစ်သွားနိုင်ပါတယ်။ကျွန်ုပ်တို့ဦးတည်ချက်ပန်းတိုင် ပျောက်ဆုံးသွားနိုင်ပါတယ်။

ပါလီမန်ဒီမိုကရေစီခေတ်မှ ယနေ့ခေတ်တိုင်အောင်ဖြစ်ပျက်ခဲ့သမျှ၊ အာဏာရှင် အဆက်ဆက် အကြောက်တရားဖန်တီးပြီး အုပ်ချုပ်ခဲ့သမျှ အိပ်မက်တွေမဟုတ်ပါ။ ဒဏ္ဍာရီမဟုတ်ပါ။ သမိုင်းဖြစ်ပါတယ်။ သမိုင်းကိုမမေ့ကြဘဲ သင်္ခါန်းစာယူသင့်ကြပါပြီ။_______________________________________
m y O e w y n n _ 1 4 . 0 5 . 2 0 1 4